• Home
• Maqaalo
• wararka
• Sports
• DIINI
• Suugaanta
• TACSI & Tahniyad
• bulshada
• Xoolaha

ASHTAKOOTHI AF-MAAY‏.

Garsoory: Gartung geeky inty liing fidhii wey ky ta’aluukte ashtaky AF-MAAY haku ashtakoothi dadkiishey Digil-i-Mirifly. Ho ilaahey erooby wey galaane garti qhaathowshe, ashtakoothung lambarshe eyi 001 sumudiyeny ety DM/MAAY/2012. Ashtakoothung wey dha taale dhibyneeghy o e AF-MAAY I eethoysineeghy o e Reewinoow. Dad wiinaghy mahkamadung roogho gartung qhaathowshe dhughunsytho haayo wey luku dhalabeey ing yo dhoorang qhawaaniingty mahkamady o murug-murugty ly yaraayo inti garty qhaathowshe dareerty. Hatyny wey ng weereey DhIbyneeghy (AF-MAAY) si usy ashtakoothis mahkamady hortiye unku sheeghythy.

Af-Maay: Siidii Gargooyow, maghaaghey wey lii ereey AF-MAAY asalki Reewineetha abkey I isirkey ky rooghy, deghyngkey Arlaathiwu dadkeyny Digil-i-Mirifluu. Wey aha waardii hamiing I maalyng ng surung ilaalothy seeriya degengky Digil-i-Mirifly, saa’ad usku dhaafy sekenkony hindhooshey ng damuujhiyaany.

Aryb I ilkyba is qhoomey, geeky wey ashtaky ku aha dadkiikey Reewinoow (Digil-i-Mirifly). Demengki mariithi duul isly jharo is dugsythaayo dangto isky eho luku dambooyo haayni; demengko dhato haayti waaby wal I duughey doo kaleetha eleentey ly saarey dangby mal oo galaany; demeneethung dembe dulmighi oo kahey dabeel ha iing galey hata dooghase lahaay; ilow dadkiikey Reewineetha si geeki mariithi ng dutheno niniing shal dughuthi reedby hang deyo haayny.

Aw-Garsoory, dadkiikey I diitheng, dadkiikey I deeriyeng, dadkiikey bersho dubnaasho ha marowky ba iing diitheng, dadkiikey fartey abtughowshee diitheng; doo kaleetha oo doorytheng. Dadkiikey wey iing diitheny ing ooky dowahang kulume siyaasothy, raathiya i telefiishane. Reegay wey terey, “TOORY LANGKA KII SURI LANG-LAAY’Y KII SYSAAFE”. Aw-Garsoory, wey fatheey dadkey ing iing bayaaniyano iing edaayang si any tang ii qhobyti? Maay any mey galabsythi, ghothob se e dadkey ku galey lo’oo gooyohaay?

Garsoory: Waany dadki Digil-i-Mirifle….mey kuku jibaabasang eedung laha siingkuku ashtakoothi? Mid-mid mahkamady hortiye hang suruma – waaky aw-siyaasi mey kuku jibaabasa eedung?

Siyaasi: Mudane Garsoore horta waha waaye mo ogtahay adugu…………………

Garsoory: shib dhe wariya, walaagi lahakooky ashtakoothiya hatyny mahkamady hortiye ly kooytey. Afky rasmyghy e o mahkamydy ky dowa ho kaleet barabaalo kiing gooy’y doone gaalshiraagha toos ng galaas. Ethebty mahkady hal dhooroy. Af-Maay ky dowahy dooghyny meelis ku wethoy.

Siyaasi: Aw-Garsoory raalahaaw walaaghung afkaano ng barythey hafiisby ho lahy surumy wal usuley lyky warymy koro ky aalany. Aw-Garsoory uny wey afkung (mahaatiri) ng ky warymaane wey niniing sheeghey ini af-mahaaritighy eyi afky dowlydy lanki dowlyd naghythony afkaasey ing ky warymy ety. Tang kaly, Soomalithy bathyngshe af-Maayky ky gorythang taasa nii kalifaasy ing uny af-Mahaatirighy ky garmaajhiny.

Af-Maay: Aw-Garsoory, siyaasighung wala usy sheeghohaay waliingto kuku bilaawyng. Maay dastuurky key ky qhorne ing afyfky rasmyghy e eying MAAY I MAHAATIRI. Wiliba ing fiirsythaa ani (maghaaghey) li ii bilaawi. Aw-Garsoory, my jarty sabyb yo haty ky binaaysythang ing yo iign diithang majaalky siyaasothy, ho demengki mariithi dowlyd ku obsythaayen geeky mey ku obsythohaayang? Tang kaly, wey leyiny Soomali bathyngshe Af-Maayky ky gorythaayang……tang weybuwa iftiry I wal ing jarny mey weeli demengki any demengkey haaytiby Soomali si ing dhoying ky dowahowkeya weydiyaayeng waany barytheng. Usy deey, Soomalithy kaly ho weerteyby ng dheegny se ky barythaayang? Aw-Garsoory wala ly sheegaw waliinto muku jarang, uthurky dhomaantis siyaasigheyu o aamingsyng ing usy sharyf I dadnimy kaleet hang saa’ithaas hoby usy any oo dheerathy. Wa siyaasi afshey (Maay) ku faana, af dathowny (af-Mahaatiri) ky faanaw. Ilaahey ithingshey dully I darhumy ma derejhy mahangku saa’ithi doonty – WETHYNAALEGHO WALAALSHEY KU ROOROOW WAARITIING WAAGHA DIITHI.

Garsoory: Waany dadki kaly: aqoonyahanky wal abtughaaw, weriyaaghi (raadiya, telefiishane, internethky) I qurbyroogti? Mahkamady hortiye hal-hal ng kooyaa eedung ku jibaaba isingko dhoorasang ethebty mahkamady. Ey siinku hoos baney, qhalydki aw-Siyaasi gali haatow ingky dhiitheng – afky rasmyghy e o mahkamadung wa AF-MAAY, mahkadung miing dul qhaathythy doonty mar demby qhaladkaas haatow.

La soco qeybaha kale………………………..

Isaak Hassanow

Melbourne, Australia

Unishef@live.com

Nagala Soo Xiriir